Isang caliber 5.56mm na baril ang ginamit sa pagpatay kay Los Baños Mayor Caesar Perez, ayon sa Philippine National Police (PNP).
Sinabi ni Police Brig. Gen. Steve Ludan, director ng PNP Crime Laboratory na ito ay base sa isinagawa nilang ballistic examination sa metallic fragments na nakuha nila sa katawan ng pinaslang na alkalde.
Dagdag pa nito, naipasok na rin nila ang mga ebidensiya sa Firearms Identification System ngunit walang lumalabas sa kanilang record.
Paliwanag ni Ludan, may posibilidad na hindi rehistrado ang baril na ginamit sa krimen.
Base sa autopsy reports, may mga tama ng bala sa ulo, katawan at kanang balikat si Perez.
Nailibing ang alkalde noong nakaraang Sabado at nag-alok ang kanyang pamilya ng P1 milyong pabuya para sa makakapagturo sa salarin.
Naisama sa ‘narco-list’ na isinapubliko ni Pangulong Rodrigo Duterte si Perez.