Mga menor de edad posibleng mapayagan nang magpunta sa mall

Posible nang mapayagan ang mga menor de edad na makalabas ng bahay ayon kay Interior Secretary Eduardo Año.

Sa televised briefing kagabi ng IATF kasama si Pangulong Rodrigo Duterte, sinabi ni Año na maglalabas ng guidelines ang Inter Agency Task Force kung saan ang mga menor de edad ay mapapayagan nang lumabas o pumunta ng mall.

Kailangan lamang ayon kay Año ay kasama nila ang kanilang magulang o guardians.

Bahagi ito ayon kay Año ng gradual expansion ng age group na pinapayagang makalabas na.

Matapos ang ilalabas na guidelines ng IATF sinabi ni Año na ito ay pagtitibayin ng ordinansa ng mga lokal na pamahalaan lalo na sa GCQ areas.