Layunin ng substitute bill ng “Faster Internet Services Act” na inakda ni Albay Rep. Joey Salceda na magbigay ng minimum standards ng serbisyo ng internet sa buong bansa at protektahan ang consumers sa napakataas na singil sa internet.
Nakapaloob din dito ang “Truth in Published Rates and Speed,” kung saan maiiwasan na rito ang overcharging sa publiko ng hidden fees gayundin ang pagbabayad sa mga ipinangako at hindi naman maibigay na internet speed ng internet service providers (ISPs).
Nakasaad sa panukala na ang minimum broadband download speed sa subscribers ay hindi bababa sa 10 MBPs para sa mga nakatira sa mga lungsod at highly urbanized cities, 5 MBPs sa iba pang mga syudad at 2 MBPs sa rural cities o mga probinsya sa loob ng dalawang taon na compliance period ng fixed at mobile internet connectivity sa buong bansa.
Malinaw namang nakapaloob din sa panukala na hindi muna oobligahin na itakda sa minimum download speed sa susunod na limang taon ang mga Public Telecommunications Entity (PTE) at ISPs na magpapalawig ng kanilang serbisyo sa “greenfield service areas” o mga lugar na dating walang serbisyo ng internet na sinertipikahan naman ng Department of Information and Communications Technology (DICT).
Mahigpit na inoobliga ng panukala ang PTEs at ISPs na i-deliver ang 80 porsyento na advertised na broadband speed, 80 porsyento na maasahang serbisyo at 80 porsyento ng ipinangakong oras.
Mahaharap naman sa parusa ng National Telecommunications Commission (NTC) ang sinumang lalabag sa paiiraling pamantayan sa internet service na nakasaad sa batas at pinagtibay ng komisyon.