Itinutulak ni Senator Francis Tolentino na mailipat ang lahat ng pondo para sa housing and resettlement programs ng ilang ahensiya ng gobyerno sa Department of Human Settlements and Urban Development (DHSUD).
Giit ni Tolentino, ito ang hakbang na nararapat gawin para epektibong matugunan ng kagawaran ang lumulubong housing backlog sa bansa.
Puna ng senador, sa kabila ng inaasahang kakulangan ng 6.57 milyon housing units sa 2022, higit P3.69 bilyon lang ang inilaan ng Department of Budget sa DHSUD sa susunod na taon at ang halaga ay wala pang limang porsyento ng hiningi ng kagawaran na P77 bilyon.
Ipinunto pa ni Tolentino ang ibinigay na pondo sa DHSUD ay wala pang isang porsyento ng P4.5-trillion 2021 proposed national budget.
“It has been stressed over and over that the first line of defense against COVID-19 is your house. But how can Filipinos shelter in place during a lockdown if we don’t have a house of our own? How can the government implement a massive housing program if the department doesn’t have an adequate housing budget? We really need more funds for the DHSUD,” pagdidiin ni Tolentino.
Pinayuhan din ng namumuno sa Senate Committee on Local Government si Housing Sec. Eduardo del Rosario na kulitin ang ilang kinauukulang ahensiya ng gobyerno na boluntaryo nang ipasa sa kanila ang inilaan sa kanilang pondo para sa pabahay at resettlement.
Sinuportahan ni Senate Minority Leader Frank Drilon ang nais na ito ni Tolentino.