Sec. Bello, inihirit ang pagtaas sa 70% kapasidad ng public transport

Sa pagpayag ng Department of Trade and Industry (DTI) na makabalik na ng 100 porsyento ang operasyon ng mga negosyo, humirit naman si Labor Secretary Silvestre Bello III na iangat sa 70 porsyento ang ridership capacity ng pampublikong transportasyon.

Sinabi ni Bello na nahihirapan na ang mga manggagawa na makasakay papasok ng trabaho at pauwi.

Nanatiling limitado ang kapasidad ng mga pampublikong transportasyon dahil sa patuloy na pagpapatupad ng isang metrong distansya sa pagitan ng mga pasahero.

Una nang binawasan ng Department of Transportation (DOTr) ang distansiya ng mga pasahero, ngunit pinakinggan ni Pangulong Rodrigo Duterte ang hiling ng iba’t ibang sektor na panatilihin ang isang metro para na rin sa kaligtasan ng mga pasahero.

Ikinatuwa naman ni Bello ang hakbang ng DTI dahil aniya, makakabalik na sa trabaho ang mga manggagawa.