Higit 12.25-M pamilya, nabigyan ng ayuda sa ilalim ng 2nd tranche ng SAP

Napagkalooban na ng ayuda ang mahigit 12.25 milyong pamilya sa ilalim ng 2nd tranche ng Social Amelioration Program (SAP).

Umabot na sa kabuuang 12,251,275 pamilyang benepisyaryo na ang nakatanggap ng cash aid.

Ito ay batay sa datos ng Department of Social Welfare and Development hanggang 8:00, Martes ng gabi (August 11).

Dahil dito, aabot na sa P74 bilyon ang nailabas ng DSWD para sa 2nd tranche ng SAP.

Sinabi pa ng kagawaran na tuloy pa rin ang pamamahagi ng emergency subsidy sa mga benepisyaryo ng SAP, kabilang ang mga “waitlisted” o karagdagang mga pamilya.