Tiniyak ni Go na pinapakinggan at ikinokonsidera ng gobyerno ang mga hinaing ng medical frontliners.
“Sila po ang mga bayani sa laban na ito. Tulungan natin sila at huwag na pahirapan pa. Lahat po ng serbisyo na pwedeng ibigay sa ating health workers, ibigay na po natin agad sa lalong madaling panahon,” diin ng senador.
Kasabay nito, pinaalalahanan din ng senador ang mga opisyal ng gobyerno na tuparin ang kanilang mga pangako.
Nabanggit din ng namumuno sa Senate Committee on Health na pinag-aaralan niya na mabigyan ng tulong pinansiyal at mga karagdagang benepisyo ang mga private health worker na gumagamot o nag-aalaga sa COVID-19 patients.
Isa sa naiisip niyang dagdag benepisyo ay life insurance coverage.
Batid niya aniya na hindi lahat ng naibibigay sa government health workers ay nakukuha din ng mga nasa pribadong sektor.