Tourist guide sa Siargao, timbog sa cocaine

Kulong ang isang tourist guide matapos arestuhin sa buy-bust operation sa Siargao Islands.

Kinilala ni Caraga Police director, Brig. Gen. Joselito Esquivel ang inaresto na si Karl Subaydo, 32-anyos, ng General Luna, Surigao del Norte.

Ayon kay Esquivel, nakumpiska nila kay Subaydo ang isang gramo ng cocaine na nagkakahalaga ng P10,000.

Dagdag pa ng opisyal, itinuturing nilang bagong drug personality ang suspek at isa itong street level individual (SLI).

Base sa ulat, ikinasa ang operasyon bandang 12:30 ng madaling araw ng Martes sa Barangay Poblacion 3 ng itinuturing na ‘surfing capital’ ng bansa.