Base sa House Bill 7053 na inihain ni Laguna Rep. Ruth Mariano-Hernandez nais nito na taasan mula sa salary grade 21 patungo sa salary grade 24 ang entry level government doctors o mula sa P59,353 na kasalukuyang sweldo ay magiging P85,074 na ang buwanang sahod.
Ang mga government nurses naman ay itataas sa salary grade 16 mula sa salary grade 11 o magiging P35,106 na ang entry level na sahod mula sa kasalukuyang P22,316.
Bukod dito, bibigyan din ng P5,000 na buwanang hazard allowance na exempted sa pagbabayad ng buwis; P75 allowance sa kada meal; P500 laundry at clothing allowance; P1,250 rice subsidy allowance; special longevity pay na katumbas ng isang buwang sweldo kada 10 taon ng serbisyo; at special risk allowance na 25% ng monthly basic salary.
Ang pagtaas anya sa sweldo ay layong mapalakas ang local health care system sa gitna ng COVID-19.
Ipinapanukala rin ng mambabatas na mabigyan ang mga ito ng P100,000 na compensation kung sila ay magkasakit habang sila ay naka-duty at P1 million naman kung sila ay masasawi sa gitna ng kanilang pagseserbisyo.