Backrider shield sa motorsiklo, walang silbi ayon kay Gov. Remulla

Nagpa-abot ng mensahe si Cavite Governor Jonvic Remulla sa Inter-Agency Task Force kaugnay sa disenyo ng backrider shield sa mga motorsiklo.

Sa kanyang Facebook post, pinasalamatan muna ni Remulla ang IATF sa inilabas na polisiya ukol sa magkasamang pagsakay ng mag-asawa sa motorsiklo.

Sa kabilang banda, sinabi ng opisyal na kung sino man ang nag-disenyo ng backrider shield ay maaring kailanman ay hindi pa sumakay ng motorsiklo.

Diin ni Remulla, delikado, perwisyo at higit sa lahat aniya, walang silbi ang shield.

Hinanapan niya ng magandang katuwiran ang paggamit sa shield ng magka-angkas na magkasama naman sa bahay.

Dapat aniya sapat na ang jacket, face mask, helmet at couple’s pass mula sa barangay.