Mga apektado ng oil spill sa Iloilo, dapat bayaran

Iginiit ni Anakalusugan Rep. Mike Defensor na kailangang bayaran ng may-ari ng power barge na sumabog at nagdulot ng oil spill sa karagatan ng Iloilo City ang mga residente sa lugar na nawalan ng kabuhayan dahil sa insidente.

Ayon kay Defensor na dating DENR secretary, dapat sagutin rin ng AC Energy Corp., ang operator ng power barge ang gastos sa paglilinis ng tumagas na langis.

Sabi ng kongresista, sa ilalim ng Oil Pollution Compensation Law of 2007, mahigpit ang pananagutang ipinapataw sa oil pollution damage.

Ginagarantiyahan rin anya nito ang sapat na kabayaran para sa mga naapektuhan lalo na iyong mga nakadepende sa pangingisda at seashell harvesting ang kabuhayan.

Gayundin ang pagsagot sa posibleng epekto sa kalusugan ng mga tao resulta ng insidente, at ang rehabilitasyon ng coastal ecosystem na nasira ng oil spill.

Sabi ni Defensor, bukod pa dito ang anumang multa na ipapataw ng Pollution Adjudication Board sa AC Energy para sa paglabag sa Clean Water Act of 2004.