Kahit simula sa Lunes (June 1) ay general community quarantine na lamang ang iiral sa Metro Manila, Region 2, Region 3 at Region 4-A pinayuhan ng PNP ang publiko na huwag lumabas ng bahay kung hindi kinakailangan.
Sa panayam ng Radyo Inquirer sinabi ni Joint Task Force COVID-19 Shield Commander
Lieutenant General Guillermo Eleazar, na masasayang ang mahigit 70 araw na sakripisyo ng lahat kung aabusuhin ng publiko ang pag-iral ng GCQ at MGCQ.
Sa ilalim aniya ng GCQ tanging ang mga APOR o authorized person outside residence lamang ang dapat na lumabas.
Kabilang dito ang mga mayroong trabaho at ang mga kailangan ng access sa essentials gaya ng pagkain at gamot.
Sinabi ni Eleazar na magdaragdag ng tauhan ang PNP sa mga establisyimento gaya ng malls.
Ito ay para masiguro na naipatutupad ang health protocols sa mga mall.