Philippine Consulate General sa Hong Kong, may paalala ukol sa passport appointment system

Nagpaalala ang Philippine Consulate General sa Hong Kong hinggil sa passport appointment system.

Ayon sa konsulado, may ilang indibidwal ang naniningil ng 40 Hong Kong dollars pataas para mapalista gamit ang passport appointment system.

Nilinaw ng konsulado na libre at walang bayad ang paggamit ng naturang sistema.

“Itinalaga ito upang ang sistema ay maging maayos at patas,” pahayag ng konsulado.

Babala nito, sinumang mahuling naniningil ng bayad ay posibleng masampahan ng kasong fraud.

Nakikipag-ugnayan na ang konsulado sa mga otoridad para mahinto ang pananamantala.

Dagdag pa nito, agad i-report sa konsulado sakaling singilin sa passport appointment system.