Lockdown hindi ipatutupad sa Malakanyang complex

Tiniyak ni Presidential spokesman Salvador Panelo na walang lockdown o hindi isasara sa publiko ang Malakanyang Complex sa Maynila.

Ito ay kahit na naka-Code Red na ang Pilipinas dahil sa Coronavirus Disease o COVID-19.

Ayon kay Panelo, hindi naman crowded o mataong lugar ang Malakanyang Complex.

Base aniya sa abiso ng Department of Health (DOH), ang tanging pinapakansela ay ang mga malalaking pagtitipon kung saan dagsa ang mga tao.

Una nang sinabi ni Panelo na walang nakikitang rason ang Palasyo na suspindehin ang trabaho sa mga tanggapan ng pamahalaan dahil hindi naman crowded ang mga ito.