14 sa 15 repatriates sa New Clark City na nakitaan ng sintomas ng flu negatibo sa COVID-19

Umakyat na sa 15 na repatriates na nasa New Clark City sa Tarlac ang nadala sa ospital matapos magpakita ng sintomas ng COVID-19.

Pero ayon sa Department of Health (DOH), 14 sa kanila ay nag-negatibo na sa COVID-19 base sa resulta ng pagsusuri ng RITM.

Sa panayam ng Radyo Inquirer kay DOH Asec. Maria Rosario Vergeire, ang 14 ay naibalik na sa New Clark City at isa na lamang ang nananatili sa ospital.

Hinihintay pa kasi ang resulta ng ginawang pagsusuri sa kaniya.

Ang 15 ay pawang nakitaan ng flu-like symptoms kaya agad dinala sa pagamutan.

Sa March 11, 2020 ay matatapos ang 14-day quarantine period sa mahigit 400 na inilikas mula sa MV Diamond Princess.