Maghahanap ang pulisya ng iba pang closed-circuit television (CCTV) footage na posibleng nakuhanan ang pananambang kay dating Bureau of Corrections (BuCor) legal service chief Frederic Santos sa Muntinlupa City.
Ayon kay Police Col. Hermogenes Cabe, hepe ng Muntinlupa City police, pinalawak nila ang sakop kung saan kukuha ng mga CCTV footage.
May depekto kasi aniya ang tatlong camera na nakuha malapit sa pinangyarihan ng krimen.
Maging ang nakuhang dashcam sa sasakyan ni Santos ay hindi aniya na-record ang insidente.
Titignan din aniya ang iba pang kuha ng mga CCTV footage sa lugar para makita ang direksyon kung saan pumunta ang dalawang hindi pa nakikilalang gunman.
Nakasakay sa motorsiklo ang dalawang responsable sa krimen nang tumakas sa insidente.