LTFRB naglabas ng preventive suspension order sa operator ng jeep na nanagasa ng mga estudyante sa Makati

Nagpalabas na ng preventive suspension order ang Land Transportation Franchising and Regulatory Board (LTFRB) laban sa operator ng jeep na sangkot sa pananagasa ng mga estudyante sa JP Rizal sa Makati.

Ayon sa LTFRB, sakop ng preventive suspension order ang lahat ng unit ng jeep na nasa ilalim ng pangangasiwa ng operator.

Isang Grade 8 student ang nasawi sa nasabing insidente habang 7 pa ang sugatan.

Tumatawid sila sa pedestrian lane nang araruhin sila ng pampasaherong jeep na minamaneho ni Crisalde Tamparong.

Base sa imbestigasyon, si Tamparong ay walang lisensya at nagpositibo pa sa paggamit ng ilegal na droga.

Ngayong araw ay nakatakda nang ihatid sa huling hantungan ang nasawing estudyante na si Jules Villapando.