Ang Wuhan City ang ground zero ng 2019 Novel Coronavirus Acute Respiratory Disease (2019-nCoV ARD).
Sa inilabas na pahayag, sinabi ng DFA na lulan ang 29 Filipino at isang sanggol ng chartered flight na lumapag sa Haribon Hangar sa Clark Air Base.
Kasama ng mga napauwing Filipino ang team na kinabibilangan ng dalawang opisyal mula sa Philippine Consulate General sa Shanghai, tatlo mula sa DFA Office of the Undersecretary for Migrant Workers’ Affairs (OUMWA), at limang medical team members mula sa Department of Health (DOH).
Pagdating ng Pilipinas, ligtas na inilipat ang mga Filipino mula sa eroplano patungo sa mga bus para madala sa Athlete’s Village sa New Clark City, Tarlac.
Sa Athlete’s Village kasi isasagawa ang 14 araw na mandatory quarantine ng mga Filipino.
Matatandaang lumipad ang team ng DFA sa Maynila patungong Wuhan City, Sabado ng gabi, para masundo ang ilang Filipino pauwi ng Pilipinas.
