Ikinasawi ng Pinay OFW sa Dubai, hindi novel coronavirus

Nilinaw ng pamahalaan ng United Arab Emirates na hindi novel coronavirus ang ikinasawi ng Pinay household worker sa Dubai.

Ayon sa ulat ng Gulf News, sinabi ng Ministry of Health and Prevention ng UAE na wala pa silang naitatalang insidente ng pagkasawi dahil sa 2019-nCoV.

Nakasaad sa pahayag ng health ministry office ng UAE na ang Pinay ay nasawi dahil sa respiratory infection.

Itinanggi ng UAE ang sinabi ni Labor Sec. Silvestre Bello na coronavirus ang ikinasawi ng OFW.

Nakipag-ugnayan na rin ang Health Ministry Office ng UAE sa World Health Organization (WHO) at sa UN special agency para itanggi na may nasawi sa kanilang lugar nang dahil sa nCoV.