Mahigit P300K na halaga ng shabu itinago sa pakete ng sigarilyo; suspek arestado sa Pasay

Arestado ng mga tauhan ng Pasay City Police ang isang lalaki makaraang makuhanan ng ilegal na droga sa operasyon sa Barangay 171, Zone 17, Malibay, Pasay City, alas 11:00 ng gabi ng Lunes (Feb. 3).

Kinilala ang suspek na si Keith Malaque, 22 anyos na nasa drgs watchlist ng pulisya.

Isang concerned citizen ang nagsumbong sa mga pulis sa nagaganap na transaksyon ng ilegal na droga sa lugar.

Nang dumating ang mga pulis, nadatnan ang suspek na nakuhanan ng isang plastic cellophane na may lamang hinihinalang shabu at tatlo pang maliliit na plastic sachet ng shabu na isinilid sa loob ng pakete ng sigarilyo.

Tinatayang aabot sa 51.4 grams ng shabu ang nakumpiska sa suspek na P349,520 ang halaga.