Mga residenteng pilit na bumalik sa danger zone sa paligid ng Taal, inalis ng PCG

Inilikas ng Philippine Coast Guard ang mga residenteng natuklasang bumalik sa mga lugar na sinara ng pamahalaan dahil sa panganib na idudulot sa kanilang buhay.

Ito ay kasunod nang isinagawang pag-i-inspeksiyon ni Commodore Artemio Abu PCG Task Force Taal sa mga buoy marker na inilagay sa 7-kilometer radius danger zone sa Taal Lake.

Sa naturang inspection, napansin ni Commodore Abu ang mga residenteng nakapuslit sa isla sa kabila nang idineklarang total lockdown.

Kinausap ni Abu ang mga residente kaugnay sa panganib ng pananatili ruon at hinikayat na lisanin at sumunod sa pinaiiral na safety measures lalo na at nananatili pa rin sa “Alert Level 3” pa ang seismic activity ng Taal Volcano.