P68-M halaga ng shabu, nasamsam sa Pasay City

Arestado ang dalawang drug suspects sa ikinasang buy-bust operation sa Pasay City, Sabado ng gabi.

Sa ulat mula kay Philippine National Police (PNP) spokesman Brig. Gen. Bernard Banac, isinagawa ang operasyon sa bahagi ng Apelo Cruz corner Edsa sa Barangay 151, Zone 16 sa Malibay bandang 8:30 ng gabi.

Nahuli sa operasyon ang drug suspects na sina Mia Bianca Atendido Churez, 22-anyos, at Dave Tajores Realin, 21-anyos.

Nakuha sa dalawa ang 10 kilo ng shabu na nagkakahalaga ng P68 milyon, P2,000 pera at isang itim na bag.

Nakakulong ang dalawa sa PNP Drug Enforcement Group (DEG) at mahaharap sa kasong paglabag sa Republic Act 9165 o Comprehensive Dangerous Drugs Act of 2002.