Ito ay kasunod ng paghahain nito ng kaso sa korte sa ginagawang pilot testing ng pamahalaan sa motorcycle taxis.
Ayon kay Transport Assistant Secretary Goddes Hope Libiran, makikita ang pagiging doble-kara ng Angkas dahil nauna silang humingi ng paumanhin sa pamahalaan sa pamamagitan ng media pero matapos ito ay humingi naman ng Temporary Restraining Order sa korte.
Nangako anya ang Angkas na sususnod sa guidelines na ipinapatupad ng gobyerno pero sa huli ay kanila rin itong kinuwestyon sa husgado.
“Dito natin makikita na doble kara ang Angkas. nag-sorry sila sa harap ng media. Nangako na susundin nila ang guidelines at makikipag-usap sa gobyerno. Ngayon, nagpunta sila sa korte para i-challenge ang gobyerno,” pahayag ni Libiran.
Kasama sa petisyon ng Angkas na tanggalin sa pilot study ang iba pang motorcycle hailling app na Joyride at Move It.
Tanong tuloy ng opisyal ang gusto lang ba ang Angkas ay makuha ng monopolyp ng motorcycle taxi.
Sabi pa ni Libiran “Gusto nila, sila lang. Hindi ba pagkontra din ito sa dati nilang statement na wala silang problema sa kompetisyon? Ano yon, kasinungalingan lang?”
Nauna rito, sinabi ng DOTr-TWG na maraming nilabag sa umiiral na guidelines ang Angkas kasama rito ang pag-ooperate sa labas ng pilot testing area, mataas na pasahe at hindi pag-susuot ng mga riders at pasahero nito ng tamang safety gears.
Bukod dito, sa datos ng Securities and Exchnage Commission lumalabas na ang Angkas ay 99 porsyentong pag-aari ng dayuhan na labag sa batas ukol sa common carriers.