Suffocation ang ikinamatay ng 2 batang nakulong sa kotse sa Antipolo City

Kumpirmadong suffocation ang dahilan ng pagkasawi ng dalawang bata na kapwa apat na taong gulang na natagpuang wala nang buhay sa loob ng nakaparadang sasakyan sa Antipolo City noong Martes.

Ito ang lumitaw sa autopsy report ng Scene of the Crime Operatives (SOCO) ng Antipolo City Police.

Posible umanong na-lock ang Mitsubishi G4 kung saan naglalaro ang mga batang sina Ren at Aljo at hindi nila nagawang makalabas.

Ang mga pasa at bukol na nakita umano sa dalawang bata ay maaring tinamo nila dahil sa pagpupumilit na mabuksan ang pintuan ng sasakyan.

Palaisipan naman sa mga otoridad kung bakit wala agad nakapansin sa mga bata habang nasa loob ng sasakyan na nakaparada sa loob ng Cavalier Subdivision sa Barangay Sta. Cruz sa Antipolo.

Linggo pa ng hapon huling nakita na naglalaro ang dalawang bata at Martes nga ng madaling araw nang makita silang kapwa wala nang buhay sa loob ng sasakyan.