Antas ng tubig sa Angat dam, muling nadagdagan; nasa halos 188-meters na

Nadagdagan sa nakalipas na magdamag ang antas ng tubig ng Angat dam.

Sa datos ng PAGASA Hydrology, nasa 187.98 meters na ang water level ng Angat alas 6:00 ng umaga ngayong Miyerkules, Nov. 27.

Bagaman nadagdagan ay malayo pa ito sa normal high-water level na 210 meters.

Ang Ipo dam naman ay nasa 100.40 meters ang water level habang ang La Mesa dam naman ay nasa 77.50 meters.

Nabawasan naman ang antas ng tubig sa Binga, Magat, at Caliraya dams.

Habang nadagdagan naman ang antas ng tubig sa San Roque at Pantabangan dams.