Ayon kay Joel Plaza, regional director ng Philippine Drug Enforcement Agency Regional Office-National Capital Region (PDEA RO-NCR), nakilala ang suspek na si Dante Peñaranda, 44-anyos.
Isinailalim aniya sa surveillance ng mga operatiba ng PDEA RO-NCR Eastern District Office (EDO) si Peñaranda nang isang buwan matapos makatanggap ng mga ulat sa ilegal na transaksyon nito ng droga.
Nakabili kasi aniya ang PDEA agent na poseur buyer sa operasyon ng ilegal na droga sa suspek sa isang gasoline station sa E. Rodriguez Avenue, Barangay Kristong Hari bandang 4:30 ng hapon.
Nakuha sa suspek ang isang plastic bag na naglalaman ng hinihinalang shabu. May bigat itong 100 gramo at nagkakahalaga ng P680,000.
Nakuha rin sa suspek ang dalawang cell phones, isang identification card at ginamit na buy-bust money.
Mahaharap ang suspek sa kasong paglabag sa Section 5 ng Article II ng Republic Act 9165 o Comprehensive Dangerous Drugs Act of 2002.