Ikinatuwa ng Palasyo ng Malacañang ang 6.2% na paglago ng gross domestic product (GDP) ng bansa para sa ikatlong kwarter ng taon.
Inilabas ng Philippine Statistics Authority (PSA) araw ng Huwebes ang GDP data kung saan pinakamabilis ang paglago ng service sector sa 6.9%, sinundan ng industry sector, 5%, at agriculture 3.1%.
Sa isang pahayag, binati ni Presidential Spokesperson Salvador Panelo ang lahat ng bahagi ng administrasyong Duterte lalo na ang nasa economic team.
“We laud everyone in the Duterte administration, specifically the members of the economic team, for maintaining our 6% or above ‘fighting target’ for economic growth in 2019,” ani Panelo.
Sa nagdaan dalawang kwarter, naging mabagal ang paglago ng ekonomiya kung saan 5.5% growth lang ang naitala partikular sa 2nd quarter.
Ang 3rd quarter GDP ay mas mataas din sa 6 percent median forecast ng mga ekonomista.
Ayon sa kalihim, ‘back on track’ nang muli ang socioeconomic goals ni Pangulong Rodrigo Duterte kasama na ang layuning maibaba ang poverty incidence ng 14 percent bago matapos ang kanyang termino sa 2022.
Sinabi ni Panelo na ang paglago ng GDP ay nagpapakita ng kakayahan ng administrasyong pangalagaan ang ekonomiya ng bansa sa kabila ng mga kinaharap na suliranin.
“This development illustrates [the administration’s] competence in other fields, such as protecting the health of the nation’s economy notwithstanding inevitable setbacks it has encountered in the past,” dagdag ni Panelo.
Kumpyansa naman ang gobyerno na maaabot ang 6 hanggang 7 percent na economic growth target para sa taong ito.