Mountain climber nasawi habang umaakyat sa Mt. Apo

Patay ang isang mountain climber makaraang atakihin sa puso habang paakyat ng Mt. Apo sa Makilala, North Cotabato.

Kinilala ang nasawi na si Joel Lape, 57 anyos at residente ng Davao City.

Ayon sa ulat, bandang alas-3:00 ng hapon noong Sabado (Oct. 26) nang mag-collapse si Lape habang umaakyat sa Mt. Apo gamit ang Makilala trail sa Barangay New Israel.

Sinubukan pa umano itong bigyan ng CPR pero tuluyan nang binawian ng buhay.

Naibaba ang bangkay ni Lape linggo ng umaga sa tulong na rin ng rescue team.

Nabatid na kasama pa ng biktima ang kanyang anak at 20 iba pang mountain climbers.