Good news sa mga motorista sa Baguio!
Mayroong P3.00 bawas sa presyo ng mga produktong petrolyo ang kumpanyang Petron sa Baguio City epektibo simula ngayong araw ng Huwebes.
Sa anunsyo ng Baguio City Public Information Office, ang bawas-presyo ay kasunod ng apela ni Mayor Benjamin Magalong sa mga kumpanya ng langis na permanente nang bawasan ang agwat sa presyo ng petrolyo sa La Union at Baguio.
Nagpatawag ng pulong si Magalong noong October 15 sa Petron, Shell at Caltex.
Gayunman, ang AVP for Corporate Affairs of Petron Corporation lamang na si Charmaine Canillas ang nakadalo.
Araw ng Miyerkules, tumawag si Canillas kay Magalong at sinabing babawasan na ang fuel prices ng hanggang P3.00 bilang tulong sa Baguio City.
Samantala, ang iba pang kumpanya ng langis ay inaasahang magbababa rin ng presyo pagkatapos ng isinasagawang negosasyon.
