144 na pasilidad nasira dahil sa tumamang malakas na lindol sa North Cotabato

Nadagdagan pa ang bilang ng mga nasirang imprastraktura matapos ang tumamang magnitude 6.3 na lindol sa Tulunan, North Cotabato.

Sa pinakahuling tala ng National Disaster Risk Reduction and Management Council (NDRRMC), nasa kabuuang 144 na imprastraktura ang nasira sa lindol.

Kabilang dito ang 70 eskwelahan, 40 bahay, 10 pribadong gusali at iba pa.

Nasa lima katao ang nasawi habang umabot naman sa 89 ang bilang ng mga nasugatan.

Samantala, aabot sa 613 na pamilya ang inilikas sa bahagi ng Region 11 at 12 kung saan ang ilan sa mga ito ay nakauwi na sa kani-kanilang tahanan.