Tumataginting na P1 milyong incentive ang ibinigay ni Pangulong Rodrigo Duterte sa mga atletang nakasungkit ng gintong medalya sa iba’t ibang international sports competition.
Sa courtesy call kagabi sa Malakanyang, sinabi ni Senador Christopher Bong Go na ibinigay ng pangulo ang P1 milyong cash incentive kina Carlos Edriel Yulo na nakasungkit ng gold medal sa world artistic gymnastics championship sa Germany at Nesthy Petecio, isa ring gold medalist sa AIBA Women’s World Boxing championship sa Russia.
Binigyan din ng pangulo ng isang milyong pisong cash si Ernest John Obiena na nakapaguwi rin ng pole vault gold sa kompetisyon sa Italy noong Hulyo
Tig-kalahating milyong piso naman ang ibinigay ni Pangulong duterte kina Hidilyn Diaz na nakapag-uwi ng dalawang bronze medals sa 2019 International Weightlifting Federation World Championships sa Thailand at Eumir Marcial na silver medalist sa AIBA World Boxing Championships sa Russia.