UV, bus ng Coast Guard at MMDA magsasakay ng mga pasahero ng LRT-2

Simula bukas ay magdaragdag ng mga bus at UV Express na magsasakay ng mga pasaherong apektado ng tigil-operasyon ng LRT-2.

Ngayong araw ay sinimulan na ang pagde-deploy ng apat na shuttle bus na nagsakay ng mga pasahero mula sa Santolan patungong Cubao.

Bukas daragdagan pa ang mga bus at magde-deploy din ng bus ang Philippine Coast Guard.

Nakipag-ugnayan na rin ang LRT Administration sa Land Transportation Franchising and Regulatory Board (LTFRB) para payagan na may makapagsakay na UV Express sa mga apektadong istasyon.

May mga nakausap na aniya silang UV Express units.

Nilinaw naman ni Cabrera na may bayad ang pamasahe kapag sa UV Express, habang libre naman ang sakay kapag sa bus ng MMDA at Coast Guard.