Nakita ng Department of Health (DOH) na ang takot ng publiko sa bakuna ang dahilan ng pagbabalik ng polio sa bansa.
Ayon kay Health Secretary Francisco Duque III, ang isyu ng Dengvaxia ang isa sa mga dahilan ng mababang bilang ng mga nagpabakuna kabilang na ang takot ng mga magulang na isama ang kanilang mga anak sa immunization program ng gobyerno.
Ang mababang coverage vaccine ay nangangahulagan ng mas mataas na transmission ng sakit gaya ng polio.
Base sa datos ng DOH, ang mga nabakunahan ng oral polio vaccine ay mababa sa target na 95 percent sa nakalipas na sampung taon.
Ang naturang porsyento sana ang kailangan para makamit ang immunity at proteksyon laban sa polio.
Sakop dapat ng tatlong doses ng oral polio vaccine ang mga bata na may edad 1 taong gulang pababa.
Pero nasa 66 percent hanggang 68 percent lamang ang average polio vaccination noong nakaraang taon at sa unang anim na buwan ngayong taon, bagay na ayon sa kalihim ay sadyang hindi sapat.