Barangay chairman sa Camarines Sur, sugatan sa pamamaril

Sugatan ang isang barangay chairman matapos pagbabarilin sa Siruma, Camarines Sur Sabado ng gabi.

Ayon kay Police Maj. Maria Luisa Calabuquib, tagapagsalita ng Bicol police, pinagbabaril ang biktimang si Romeo Decin habang nasa loob ng kaniyang bahay bandang 7:45 ng gabi.

Si Decin ay chairman ng Barangay Nalayahan sa nasabing bayan.

Agad namang nakatakas ang hindi pa nakikilala ang responsable sa pamamaril.

Nakuha ng mga pulis sa pinangyarihan ng krimen ang walong basyo ng bala ng caliber 45 na baril.

Patuloy pa naman ang isinasagawang imbestigasyon ng pulisya sa kung ano ang motibo sa likod ng pananambang.