Viral ngayon sa social media ang video ng isang bastos na taxi driver na nagbabantang gugulpihin ang kanyang dalawang babaeng pasahero na tumangging dagdagan ang patak ng metro ng kanyang taxi.
Sa video clip na ibinahagi ni Joanna Garcia sa kanyang Facebook page, makikita ang pagwawala ng driver na may plakang UWB-666 na kanyang nasakyan kasama ang isa pang babaeng kaibigan.
Salaysay ni Garcia sa kanyang post, sumakay sila sa taxi at nagpapahatid sa POEA kahapon.
Una pa man, siningil na sila ng P250 ng driver ngunit sinabi nilang ibaba na lamang ang metro.
Nang dumating sa POEA, nagbayad si Garcia ng 200 sa kabila ng katotohanang P140 lamang ang metro ngunit nagalit umano ang driver nang hingin nila ang sukli ng kanilang ibinayad.
Dito na pinagmumura ng driver ang dalawang pasahero na lalong nagalit at nagtangka pang manuntok nang malamang kinukunan siya ng video ng dalawang pasahero.
“Sabi sakin ni kuya sasapakin ako pag di ako bumababa, nung makita nya na vinideo ko sya pinukpuk nya ako.. so bumababa na ako and nagstop ng video,” paliwanag ni Garcia sa kanyang FB post.
Sa ngayon, naghain na ng reklamo sa pulisya at LTFRB si Garcia at pinaghahanap na ang driver ng naturang taxi na may plakang UWB-666.