Pagpalag ni Te ukol sa GCTA, sinopla ng Malakanyang

Sinopla ng Palasyo ng Malakanyang ang pahayag ni dating Supreme Court spokesman Theodore Te na labag sa Article 3, Section 22 ng 1987 Constitution kung pababalikin pa ng bilangguan ang halos 2,000 preso na nakalaya sa ilalim ng Good Conduct Time Allowance.

Iginiit pa ni Te na sa ilalim ng Article 99 ng Revised Penal Code, hindi maaring ma-revoke ang GCTA.

Pero sa panayam ng Radyo Inquirer, sinabi ni Presidential spokesman Salvador Panelo na walang violation kung ibabalik ng kulungan ang mga bilanggo.

Nakasaad naman aniya Republic act 10592 o GCTA na may kaakibat itong kondisyon.

Kung hindi aniya nag-qualify ang mga bilanggo sa kondisyon na isinasaad sa GCTA, maari naman silang maibalik ng kulungan.

Sa ngayon, nasa pagpapasya na aniya ng Department of Justice (DOJ) at Bureau of Corrections (BuCor) ang pagpapasya kung ipaaarestong muli ang mga nakalayang bilanggo o kung anong hakbang ang dapat na gawin.

Una rito, sinabi ni Panelo na maaring iparestong muli ang mga nakalayang bilanggo kung makikitang hindi sila kwalipikado sa GCTA bagay na pinalagan na Te dahil labag daw ito sa batas. (END/CY)