Presyo ng diesel at gasolina bababa, gaas tataas

May katiting na bawas-presyo ang mga kumpanya ng langis sa gasolina at diesel simula bukas, August 27.

Sa anunsyo ng Shell, Petro Gazz, PTT Philippines at Phoenix Petroleum, parehong may bawas na P0.10 ang kada litro ng diesel at gasolina.

May P0.10 na dagdag naman sa presyo ng kada litro ng kerosene o gaas ang Shell.

Epektibo ang price adjustments ng naturang mga kumpanya ng langis alas-6:00 ng umaga bukas, Martes.

Buena mano namang nagpatupad ng bawas-presyo ang Cleanfuel alas-4:01 pa lang ng hapon ng Linggo.

Mas malaki ang rollback ng Cleanfuel o P0.20 sa kada litro ng gasolina at P0.15 naman sa kada litro ng diesel.

Inaasahang mag-aanunsyo na rin ng galaw sa presyo ang ilan pang kumpanya ng langis ngayong araw.