Korupsyon sa PhilHealth, dapat munang mahinto bago taasan ang buwis sa alcohol – Sen. Gatchalian

Inihayag ni Senator Sherwin Gatchalian na dapat munang mahinto ang korupyson sa Philippine Health Insurance Corporation (PhilHealth) bago simulan ang pagpapataw ng mas mataas na buwis sa mga inuming nakalalasing.

Sa inilabas na pahayag, sinabi ng senador na lumalabas sa mga ulat na malaki ang nawawala sa PhilHealth dahil sa korupsyon.

Iginiit ni Gatchalian na ang pagtataas ng buwis ay para mapondohan ang Universal Health Care program ng pamahalaan.

Nakababahala aniya ang iniulat ng Commission on Audit (COA) kung saan nasa P102.5 bilyon ang nawawala sa overpayment ng PhilHealth mula 2013 hanggang 2018.

Ipinunto rin ng senador ang ghost kidney treatment sa WellMed Dialysis Center sa Quezon City.

Ani Gatchalian, kung hindi mahihinto muna ang korupsyon, lumalabas na parang pinopondohan pa ang ilegal na aktibidad sa ahensya.