Welcome development sa kampo ni Senator Leila De Lima ang pagka-aresto sa umano’y kanyang pamangkin at bagman sa kasong droga na kanyang kinakaharap.
Ikinatuwa ng panig ng Senador na nahuli na si Jose Adrian Dera dahil sa magiging epekto ng testimonya nito sa kaso.
Ayon kay Atty. Filibon Tacordon, abogado ni De Lima, si Dera mismo ang magde-deny na ginamit siya ng Senadora para makalikom ng pera mula sa mga high-profile inmates sa New Bilibid Prison.
Matatandaan na sinabi ng umanoy drug lord na si Peter Co na dalawang beses itong nagbigay ng P5 milyon kay Dera para sa kandidatura ni De Lima bilang Senador.
Si Dera ay naaresto ng NBI sa Angeles, Pampanga Biyernes ng umaga.
Itinanggi naman nito na pamangkin at bagman siya ng Senadora at iginiit na isa siyang police asset.