Anti-death penalty advocates pinayuhan na ipagdasal ang pagbaba ng crime rate

Pinayuhan ni House Speaker Alan Peter Cayetano ang mga kritiko ng death penalty na samahan ng dasal at aksyon para magawan ng paraan ang pagbaba ng krimen sa bansa.

Ayon kay Cayetano, naniniwala siya na malaki ang magiging impluwensya ng pagbaba ng krimen laban sa isinusulong na death penalty.

Dapat din aniya na palakasin pa ng mga otoridad ang kampanya kontra iligal na droga.

Paliwanag ni Cayetano, puspusan lang naman ang pagsusulong ni Pangulong Rodrigo Duterte sa parusang kamatayan dahil tuluy-tuloy pa rin ang droga at krimen pero kung bababa ang crime rate sa bansa ay mababalewala ang debate sa pagbabalik ng death penalty.

Sa Kamara pa lamang hati ang mga kongresista sa pagbabalik ng parusang kamatayan.