Magpapatupad ng self-demolition ang Philippine National Police sa mga himpilan ng pulisya na nakatayo sa mga bangketa.
Sinabi ni PNP Chief Oscar Albayalde na maglalabas siya ng direktiba sa lahat ng mga regional directors sa bansa para ipatupad ang nasabing kautusan.
Kaninang umaga ay sinimulan na ni Albayalde ang nasabing self-demolition sa pamamagitan ng pagdurog sa presinto ng San Juan Police Precinct 6 sa West Crame sa nasabing lungsod.
Ipinaliwanag ng opisyal na ito ay bilang pagsunod sa utos ni Pangulong Rodrigo Duterte na pag-reclaim sa lahat ng mga kalsada laban sa mga iligal na istraktura.
Nangako naman ang opisyal na hahanap sila ng maayos na mga lugar para doon itayo ang mga maapektuhang presinto ng pulisya.