Nagtulung-tulong ang mga kawani ng iba’t ibang departamento ng Taguig City government para linisin ang mga lansangan sa lungsod ng lahat ng uri ng mga sagabal.
Ang mga naglinis na mga kawani ay mula sa Traffic Management Office, Public Order and Safety Office, Market Management Office, Business Permits and Licensing Office, General Services Office, at Solid Waste Management Office, katulong ang Philippine National Police (PNP) at Metropolitan Manila Development Authority (MMDA).
Itinuloy lang ni Mayor Lino Cayetano ang ginawa ni dating Mayor Lani Cayetano sa pagsasagawa ng clearing operations sa lungsod.
Alinsunod na rin ito sa bilin ni Pangulong Duterte sa kaniyang huling State of the Nation Address (SONA) na wakasan na ang tila pag-angkin ng mga pribadong mamamayan sa mga pampublikong kalsada.
Naniniwala si Cayetano na ang malinis na lansangan ay ligtas para sa mamamayan.