Nadagdagan pa ang bilang ng mga nasawi sa tumamang dalawang malakas na lindol sa Itbayat, Batanes.
Ayon kay Nilda Garcia, opisyal mula sa Local Disaster Risk Reduction and Management Office (LDRRMO), natagpuan ang katawan ng biktimang si Edwin Ponce sa gumuhong kuweba sa Itbayat.
Si Ponce, residente ng Barangay Sta. Maria, ang ika-siyam na nasawi sa serye ng lindol sa lugar.
Samantala, sinabi ni Garcia na nasa mahigit-kumulang 2,000 residente ang nananatili sa mga tent sa plaza.
Kulang aniya ang mga dumarating na tent para sa mga residente kung kayat nababasa sila tuwing umuulan sa lugar.
Sa tala ng National Disaster Risk Reduction and Management Council (NDRRMC) bandang Lunes ng umaga, nasa 911 pamilya o 2,963 na indibidwal ang apektado ng dalawang lindol.