P100K pabuya sa makapagtuturo sa suspek sa pagpatay sa Gr. 7 student sa Laguna

Tatanggap ng P100,000 na pabuya ang sinumang makapagbibigay impormasyon sa kinaroronan ng suspek sa pamamaril ng Grade 7 student sa Calamba City, Laguna.

Ayon kay Police Colonel Eleazar Matta, Provincial Director ng Laguna Police, ang perang ipamimigay ay mula kay Laguna Governor Ramil Fernandez.

Kasalukuyan pa ring tinutugis ng pulisya ang suspek na si Renan Estrophe Valderama alyas Renz Ivan na nasa 30-35 anyos at dating security guard.

Lumabas din sa paunang imbestigasyon na mayroong relasyon si Valderama sa biktima na si Mark Anthony Miranda, 15 anyos.

Binaril ng suspek ang binatilyo sa loob ng silid-aralan nito sa Castor Alviar National High School noong July 4.