Drug suspect patay, isa pa sugatan sa buy bust sa Cebu

Patay ang isang tulak ng droga at sugatan ang isa pa sa buy bust operation sa Barangay Candulawan sa Talisay, Cebu araw ng Sabado.

Kinilala ni Police Major Orlando Carag Jr., Talisay Police Station chief, ang suspek na si Nolito Sacaday na nasawi sa 10 minutong shootout sa mga pulis.

Sugatan naman ang kasamahan ni Sacaday na si Roy Dinoy.

Narekober sa lugar ang isang baril, mga bala at mga sachet ng shabu.

Si Sacaday ang target ng operasyon ng pulisya pero si Dinoy ang nag-abot ng shabu sa isang undercover na pulis.

Pero natunugan ni Sacaday na pulis ang kanilang katransaksyon kaya namaril ito.

Gumanti ng putok ang pulisya na ikinamatay si Sacaday.