Lalaki patay sa pamamaril sa Antipolo City

Agad na nasawi ang isang lalaki matapos barilin ng hindi pa nakilalang mga salarin na magka-angkas sa motorsiklo sa Antipolo City.

Nangyari ang insidente miyerkules ng gabi ng Hunyo 26 sa isang drug store sa Barangay San Roque kung saan nasugatan din ang isa pang biktima.

Kinilala ng pulisya ang biktima na si Joel Malapo , habang ang nasugatan ay kinilalang si Johnrel Elpanag.

Nabatid pa sa imbestigasyon na nakatayo lamang si Malapo sa labas ng drug store nang dumating ang mga nakamotor na lalaki at pinagbabaril, tinamaan din ng bala ang katabi nitong si Elpanag.