Babae patay sa pamamaril sa Pangasinan

Patay ang isang babae makaraang pagbabarilin ng hindi pa kilalang suspek sa Sison, Pangasinan Huwebes ng gabi (June 20).

Ayon sa mga imbestigador, mabilis nakatakas ang suspek matapos ang pamamaril sa Barangay Poblacion Sur bandang 9:30 ng gabi.

Sinabi ng pulisya na nagtamo ang hindi pa nakikilalang biktima ng multiple bullet wounds.

Isinugod pa sa ospital ang biktima ngunit idineklara ring dead-on-arrival sa Pozorrubio Community Hospital.

Ang biktima na posibleng may edad 16 hanggang 19 ay nakasuot ng t-shirt, asul na short pants at dilaw na tsinelas nang mangyari ang krimen.

Sa ngayon, patuloy pa ang isinasagawang imbestigasyon sa pamamaril.