Robredo bibisitahin ang 22 mangingisda ng F/B Gem-Ver 1

Bibisitahin ngayong araw, June 21 ni Vice President Leni Robredo ang 22 mangingisda ng F/B Gem-Ver 1, ang bangkang lumubog matapos banggain ng Chinese vessel sa Recto Bank.

Ayon sa tagapagsalita ng bise-presidente na si Barry Gutierrez, makikipagdayalogo si Robredo sa mga mangingisda.

Ang pagbisita ng bise presidente ay dalawang araw matapos bawiin ni Junel Insigne, kapitan ng Gem-Ver, ang kanyang naging pahayag na intensyonal silang binangga ng Chinese vessel.

Naganap ang pagbawi ni Insigne sa kanyang pahayag matapos ang closed-door meeting kasama si Agriculture Secretary Manny Piñol.

Nauna nang sinabi ni Robredo na nais niyang humarap sa korte sa Pilipinas ang crew ng Chinese vessel.