Nahaharap sa kasong parricide ang isang construction worker na pinatay ang kanyang kuya habang sila ay nag-aaway sa kanilang bahay sa Sitio Atabay, Barangay Poblacion, Cordova, Cebu.
Nakakulong sa Cordova Police Station si Eduardo Sitoy, 42 anyos, matapos itong sumuko sa mga pulis dahil sa pagbaril sa kanyang nakatatandang kapatid na si Reynaldo, 55 anyos.
Ayon kay Police Staff Sergeant Reynato Inot ng Cordova Police Station, lumabas sa imbestigasyon na nag-away ang magkapatid araw ng Huwebes.
Sa gitna ng away ay naghagilap anya sina Reynaldo at Eduardo ng mga armas na magagamit laban sa bawat isa.
Hawak ang kutsilyo ay kinompronta umano ng kuya ang nakababatang kapatid nito na armado naman ng .357 revolver.
Sa puntong ito ay binaril ng suspek ang kapatid sa ulo nito.
Sa kanyang pagsuko sa pulisya ay isinuko rin ng suspek ang baril na ginamit nito sa pagpatay sa kanyang kuya.
Wala namang impormasyon kung ano ang pinag-awayan ng magkapatid na Sitoy.