South Korea at Pilipinas pag-uusapan ang reshipping ng basura ngayong araw

Nakatakdang magpulong ngayong araw ang ilang kinatawan ng gobyerno ng South Korea at Filipino officials mula sa pampubliko at pribadong sektor upang pag-usapan ang gagawing reshipping o pagbabalik sa South Korea ng mga basurang ipinadala sa Pilipinas.

Ayon kay Misamis Oriental Representative Juliette Uy, nakatakda ang pulong ngayong alas-10:00 ng umaga sa MICTSI Administration Building, MCT Compound sa Tagoloan, Misamis Oriental.

Isa sa mga dadalo si Uy at imbitado rin ang mga kongresista mula sa Mindanao.

Nasa 5,000 tonelada ng basura mula South Korea ang nakapasok sa bansa sa pamamagitan ng shipment na nakapangalan sa Verde Soko.

Nakatakdang dalhin ang mga basura sa PHIVIDEC Industrial Estate.

Napag-alaman ng House Committee on Good Government and Public Accountability at House Committee on Ecology na may pananagutan ang PHIVIDEC Industrial Estate sa importasyon ng basura mula sa South Korea.

Magugunitang mahigit 1,000 toneladang basura na iligal na ipinasok sa bansa ang ibinalik sa Canada, gayundin ay ibinalik ang 25,000 kilo ng electronic waste sa Hong Kong.

Dahil dito, ipinanukala ni Uy ang House Bill 9207 na layon ang total ban sa importasyon at eksportasyon ng mga basura.